Christoph Wagner's Weblog

30.11.03 @ 17:59

Advent im wilden Oberösterreich

Erst unlängst in meiner Mühlviertler Heimat zwischen Afiesl und Wendling unterwegs, möchte ich meinen speising-Lesern das folgende Weihnachtsgedicht nicht vorenthalten, das ich bei einem Schneetreiben erlauscht habe:

kuiturkaumpf

da pforra von woidschach, der mecht i sei gwen,
der hat in weihnachtsmau troffa, mit schlitten und ren.
heast mau, hat a g´sogt, von dia hau i schau gnua,
wos losst ma denn net unsa christkind in ruah.

heast mau, hat a weiterg´sogt, hier baust du auf sand,
rot´s schiach´s hollywood-mandl aus disneyland.
da weihnachtsmau, wiara dös heat, hätt fost great.
sogt: „i hob doch a nua die kinda bescheat.
die kennen mi hoit aus füm und tevau,
und warat des christkind nur hoibat so schlau,
so tat´s in die sitcoms a paar packeln verstecken,
statt nur aus der krippen die hirten zu necken."

da pforra beim zuahörn is wuan rot vua zuan,
fast hot´s ausg´schaut ois sei in ihn da teifi reing´fuan.
„du kraumpata auslända, host nu was zum sogn?"
frogt er mit stanerner stimme den weihnachtsmaun.
der bibbert und bebt, woaß ein net no aus,
und sogt bloß: „i bin´ s, pforra, da nikolaus!"

doch da pforra, wia der schrecken der inquisition,
sagt: „die ausred´, die foit dir z´spät ein, mein sohn!
der nikolaus, den wir hier alle sehr meg´n,
den hot scho seit sechsten dezember neamt g´segn!"
„hab mitleid, pforra, bitte tua mer nix au!"
wimmert und wehklagt der weihnachtsmau.

doch da pforra, der prügelt ihn durch den finsteren tann
und bind´t eam zum schluß aun an taunnabam an.
daun loßt eam da pforra in der köt´n alla steh
und geht z´ruck durch den schnee hin zu sein bmw.
dort hoit er an kanister, ganz voll mit benzin,
giaßt eam über den weihnachtsmau und hoit eams feiazeig hi.
wünscht an schen gruaß nu vom christkind und zindt mitten im tann
mit dem bic-feuerzeug glatt den weihnachtsmann an.

er singt halleluja und sagt wia im tram:
„des war heia mei schönsta weihnachtsbam.”

2 Kommentare | Kommentar abgeben

ChristophWagner, 01.12.03 @ 11:26

noch eins
da jaga

es gengand in der heiting zeit
dö leit oft wiakli ziemli weit,
wia haum mi unlängst a poa g´nannt?
i sei a weihnachtsignorant,
nua weil i z´weihnachten ganz g´wiß
koan karpfen und koa gansl iß.
i schluck a net die siaße krot
von christstollen und kletzenbrot.
des ois kimt mir net in den sinn,
weil i a oida jaga bin.
bei uns gibt´s, solaung d´ höana blosn´,
zu weihnachten an ostahosn.

snoarf, 30.11.03 @ 21:54

sehr gut! Da kenn' ich auch eines: Die Krampusschlacht
In Dipflham, da Bäcker Macha,
hat wundaschöne Krampus bacha.
Mords Waschln, bis oan Meter Läng,
War'n aufgstöllt auf da Backstubnbeng.

De schiachen Augn, de langen Zungen,
De Herndln, san so guat gelungen,
Als wanns grad lebat'n allsand;
Mords Ruatna habns ah in da Hand.

Danebn in oana Trucha drein,
Schlicht schön da Bäck de fertign ein.
De andern müassen übertrickan,
Daß do de Zungen recht guat pickan.

Aft tuat da Bäck si 's Mehl a'putzen,
Er überrechnet gschwind sein Nutzen
Und hat a große Freud darnah,
Denn 's ander Bacht wirft eh nix a.

"'s Mäul kann ma net am Nagl hänga",
Tuat si da guate Moasta denka,
"Wer fleißi arwat, braucht net darbn,
I muaß in Mehlstaub abi schwoabn."

Im Wirtshaus aft "Zur guaten Rast",
War er af d'Nacht da beste Gast.
Des Bier is nur so abi grunna.
Heut kann a si ja was vagunna

Und wias zum sperrn war und zum gehen,
Kann er kam auf'n Füaßen stehn.
"So derf mei Alte mi net sehgn!"
So viel hat er nu denka mögn.

Sperrt d'Backstubn auf, schön schleuni, schleuni,
Kriagt's Übergwicht und fallt glei eini.
Bumali richt a si in d'Höh
Und draht si 's Liacht auf in da Näh'.

Des Bildl, was a drauf dasichat,
Des macht'n beinah wieder niacht.
Vo alle Seiten bei de Wänd,
Hat schier da Teufi vüra zehnt,

Im Rausch, - de Einbildung hats gebn, -
Moant er, dass alle Krampus lebn
Und haben so grinst, als wollt'ns sagn:
"Hiatzt haben ma di amal beim Kragn."

"Hörts", sagt da Bäck, der d'Furcht net kennt,
"Eng fall i heut nu net in d'Händ.
I fürchten? - Aber gar koa Spur!
Mi bringt net leicht was aus da Ruah!

Es Kerln, tats ma lang nu nix
Und hab i ah koa Kruzifix,
So wia i mi alloan dawehrn
Und zoag eng, moan i, nu an Herrn!"

Aft geht a schneidi auf eahn los,
Es war eahm koana z'grimm und z'groß.
Bis dass a alle hat dawürgt
Und nur mehr Bröckln umliegn siagt.

Weils Unglück nia alloane kimmt,
Fliagt er auf d'Letzt, dass alls z'sammstimmt,
In d'Vorratstrucha, o du Gfrett
Und wird drein schlafat, wia im Bett.

Am andern Tag war d'Schneid vorbei,
Am Schlachtfeld steht sein Ehewei;
Den Krampus fürcht a! - na und nacha,
Muaß er de ganzen nu'mal macha.